3.3 Stærðir sjóðsins

Tryggingafræðileg staða

Athugun á tryggingafræðilegri stöðu hefur þann tilgang að meta eignir sjóðsins á móti þeim skuldbindingum sem felast í áunnum réttindum og framtíðarréttindum sjóðfélaga til lífeyris.

Í tryggingafræðilegri úttekt er metið hvort jafnvægi sé milli heildareigna og heildarskuldbindinga lífeyrissjóðsins. Þannig er annars vegar lagt mat á hreina eign sjóðsins til greiðslu lífeyris ásamt reiknuðu núvirði framtíðariðgjalda virkra sjóðfélaga og hins vegar núvirði væntanlegs lífeyris vegna þegar greiddra iðgjalda. Ef mismunur, á þannig reiknuðum heildareignum og heildarskuldbindingum, er meiri en 10% er hlutaðeigandi sjóði skylt að gera nauðsynlegar breytingar á samþykktum sjóðsins. Sama gildir ef munur hefur haldist meiri en 5% samfellt í fimm ár.

Miðað er við að ávöxtun eigna sjóðsins verði árlega 3,5% umfram hækkun vísitölu neysluverðs.

Tryggingafræðileg úttekt 2023

Við tryggingafræðilega úttekt er miðað við að ávöxtun eigna sjóðsins verði árlega 3,5% umfram hækkun vísitölu neysluverðs

Samþykktabreytingar fyrir A og V deild

Breytingar voru gerðar á árinu bæði á jafnri réttindaávinnslu í A deild og áunnum réttindum í A deild og V deild sjóðsins. Ástæða breytinganna var tryggingafræðilegur halli sem var tilkominn annars vegar vegna innleiðingu á nýju reiknilíkani Félags íslenskra tryggingastærðfræðinga á lífslíkum landsmanna þar sem gert er ráð fyrir að lífaldur haldi áfram að hækka og hins vegar vegna slakrar ávöxtunar á árinu 2022.

Með þeim breytingum á samþykktum sjóðsins sem varða réttindi í A og V deild eiga deildirnar að geta staðið við skuldbindingar sínar í samræmi við markmið og áskilnað laga nr. 129/1997 og samþykkta sjóðsins.

Nánar um samþykktabreytingar